عشان من مده مفرحناش وعن روحنا معبرناش
وجبل الحزن جوانا معيشنا حياتنا طناش
زرعنا الأرض بعرقنا وأخدوا زرعنا ببلاش
وفوق ظهر البلد كرباج وطاح فى الكل ولا خلاش
وضيّع الأمل منى وراح أملى ولسه مجاش
لكن بفرح مع الكورة وألاقى نفسى فى الصورة
عشان فى الكورة حرية فى غير الكورة ملقتهاش
عشان نفسى فى يوم أفرح ومفرحتش بقالى سنين
ورابط حَجره على بطنى وعلى قلبى شايل حجرين
ومليون قفل فى لسانى وغيرى له لسان واتنين
وبينافق بألف لسان وله عند اللزوم وشين
وله فى السرقة ألف دراع وهرّب م البلد ملايين
أنا بفرح مع الكورة وألاقى نفسى فى الصورة
ديمقراطية الكورة متقبلشى فريق فاشلين
عشان نفسى فى يوم أفرح بقول لـ(شحاتة) يا معلم
أنا بحبك عشان دايمًا تخلى الشبكة تتكلم
مخلتش (كريم) ابنك فى كل الفرقة يتحكم
ولا شوفناه فى يوم كابتن عليه الكل بيّخدم
ولا شوفناه طرد لاعب ولا ناوى فى يوم يظلم
عشان الكورة مشهورة ودايمًا باينة فى الصورة
أساسها علم وكفاءة ولا مسيحى ولا مسلم
عشان نفسى فى يوم أفرح بلاقى فرحتى فى لعبة
بتفرح فيها كل الناس وتهرب من النكد حبة
بنهرب فيها من جوعنا وننسى العدس أبوجبة
وننسى الفول وأيامه وقمح متقبلوش دابة
ودستور لسه فيه مهموز وفيل حابسينه فى العلبة
كفاية علينا الكورة ولا عجوزة ولا عورة
كفاية فيها حرية ولا تكية ولا عزبة
مقتنبس من جريدة المصرى اليوم
Ahlamontada 
موضوع: والله زمان 
